{

صباحكم أعياد و أفراح
اليوم الأول للعيد كان بالنسبه لي مختلف
بالرغم إني كنت بعيد عن التجمعات العائليه و يمكن هذا السبب الإختلاف

أول الإختلافات بهالعيد هو ( عطري )

بالعاده عطري هو ( Wish ) تقدرون تقولون عشره عمر أنا و هو

قررت أغيره هالعيد وكان القرار صعب – مو أي عطر أحسه يناسبني

وقف الاختيار على عطر ( ALLURE SPORT )

حسيته قريب مني و من ذوقي والظاهر بمسك فيه

- المقلب -

أما مقلب على كيفك كيفكم
بس إكتشفت منه إن فيه منطقة بالدماغ عندي ما تشتغل هذا سلمكم الله بغيت أتصل على أخوي ليله العيد
رد عليّ صوت ما أعرفه قال من أنت ؟!! رديت وش اللي من أنت ؟ أنت من اللي أنت ؟؟
قال صاحب هالجوال كان معي بالليموزين ونساه . تعرف منهو ؟
أنا قعدت أحلل أخوي ؟ وليموزين ؟ وناسي جواله ؟ والله غريبه
المهم قالي يا اخوي ياليت تكلمه يجي يقابلني وياخذ جواله الليله عيد ومشغول و و و
قلت خلاص أبشر بحاول أوصله – طوط طوط طوط

العلم إني مو بجده وكيف أكلم أخوي الحين
وهو برا يعني ما بيرجع إلا متأخر واللي معه ما أعرف أرقامهم
قلت تدري إسسسسسسسسسسحب

عاد رحت للحلاق نضبط و نسمكر إلا يرجع يتصل فيني صاحب الليموزين
هااااه .. بشررر ؟ وش صار كلمته ؟
قلتله والله ما لقيت له طريق .. قال لي يا اخي انا في جده وبروح مكه بعد شوي وبعدها طالع للطايف شوفلك حل ؟ وش اشوف لك ما اشوف لك كأني ماسك بحلقه قلتله يا اخي تيسر والله معك ما أقدر اسوي شي ولا انا في جده الحين اقابلك واذا رجعت نتقابل ( وانا غاسل يدي )
قال تدري شلون بحط الجوال بشرطة الجنوب وش رايك قلت حلوو كلام سليم قال طيب كم رقم بطاقته عشان يسلمونه لا جا قلت وش دراني ما حفظت رقم بطاقتي قال اهاااا أجل تدري وين مطعم فيروز وأنا أحطه له هناك ؟ ( انا هنا قلت بيني و بين نفسي وش دخل مطعم فيروز ؟ معقوله اخوي ركب معاه وجاب طاري هالمطعم لأنه اخوي دايم يسألني عنه بحكم إني خبره فيه) المهم إني وصفت له المطعم وين وما وين قال تدري لالالا ما ينفع مطعم صعبه قلت تدري عطني 5 دقايق يا اوصل لأخوي يا توكل على الله ترى ماني فاضيلك اللي بالصالون كلهم كانوا يناظرون فيني وخاصه ان الصوت مو واضح وانا اصارخ

العلم
إن ربكم هداني ودقيت على واحد طلع إنه مع أخوي وقتها وقلتله هاته واكلمه وين جوالك يالدلخ ( بحكم إني أكبر منه فأمون ) قال هااه الجوال ؟ وين الجوال ؟ افاااا نسيته بالليموزين قلت أي ليموزين وما ليموزين وانت وش مركبك الليموزين من أساسه قال تدري كلمه وقوله يوديه لشرطه الجنوب ؟ أنا هنا قلت يا ولد وش سالفه شرطه الجنوب ؟ لا يكون مسوين عرض الجوال الضايع تاخذ بداله جوالين ؟ قلت طيب بقوله .. قال تدري خله يوديه لمطعم فيروز ؟ يا ولد وش السالفه هذا يقول شرطة الجنوب وهذا يقول شرطة الجنوب هذاك يقول مطعم الفيروز وهذا يقول مطعم الفيروز الأكيد إن عقلي علق أبو 10 دقايق رديت عليه قلت طيب بقوله يوديه للمطعم إنت وين ؟ قال أنا بشارع الدلوخ يالدلخ ( صااااااادوه )

طلع اللي كان يكلمني هو ولد عمي عساه باللي مانيب قايل
وأثاريهم طفشانين ولقوا من يطقطقون على راسه
لكن هين لنا لقاء ورادها رادها الله لا يعوق بشر

Popularity: 4% [?]